डेडिकेटेड र ट्रंकलाइन बक्यौता विवादमा प्राधिकरणको कदमप्रति सोपानको आपत्ति

डेडिकेटेड र ट्रंकलाइन बक्यौता उठाउन नेपाल विद्युत् प्राधिकरणले चालेको कदमप्रति सौर्य ऊर्जा उत्पादकहरूको संस्था(सोपान)ले आपत्ति जनाएको छ । सोपानले शुक्रबार विज्ञप्ति जारी गर्दै प्राधिकरणले सिद्धान्तविपरीत बक्यौता उठाउने कदम चालेको भन्दै आपत्ति जनाएको हो ।

प्राधिकरणका प्रबन्ध निर्देशक कुलमान घिसिङले बक्यौता विवादमा विभिन्न उर्जा उत्पादक कम्पनीलाई पत्र पठाएका थिए ।

उनले उक्त पत्रमा विद्युत् बिक्री सम्झौता (पीपीए) बमोजिम प्राधिकरणले दिनुपर्ने भुक्तानी रोकेर उद्योगहरूको बक्यौता असुली गर्ने जानकारी गराएका थिए । 

प्राधिकरणको उक्त निर्णय नियमविपरीत रहेको सोपानको भनाइ छ ।

‘प्राधिकरणले पठाएको सो पत्र प्राधिकरण र उर्जा उत्पादक कम्पनीहरूबीच भएको विद्युत् बिक्री सम्झौताको प्रावधानविपरीत रहेको छ । दोस्रो, केवल साझा शेयरधनी रहेको आधारमा एउटा कम्पनीले भुक्तानी गर्नुपर्ने बक्यौता रकमको दायित्व बिलकुलै स्वतन्त्र अस्तित्व रहेको अर्को कम्पनीलाई बहन गराउने कार्य कम्पनी कानूनको स्थापित सिद्धान्तविपरीत हुन्छ’, विज्ञप्तिमा उल्लेख छ । 

बक्यौता असुलउपर गर्नाले सम्पूर्ण शेयरधनीको हक अधिकारमा समेत गम्भीर आघात पर्ने सोपानको भनाइ छ । 

उर्जा कम्पनीहरूको मुख्य आय आर्जनको श्रोत नै प्राधिकरणलाई विद्युत् बिक्री गरी प्राप्त हुने रकम भएकोले रकम कट्टा भएमा कम्पनीद्वारा सञ्चालित परियोजनाको सम्भाव्यतामा नै ठूलो असर पर्न जाने सोपानले उल्लेख गरेको छ ।

उर्जा क्षेत्रमा प्राधिकरणको  कदमले नकरात्मक असर पार्ने प्रष्ट देखिनुका साथै, आगामी १० वर्षमा १० हजार  मेगावाट उत्पादनको लक्ष्यमा समेत गम्भीर असर पार्ने सोपानको दाबी छ। 

‘बक्यौता रहेका उद्योग तथा कम्पनीहरूको रकम फरक अस्तित्व रहेका उर्जा कम्पनीहरूबाट असुलउपर गर्न नमिल्ने हुँदा, सो गर्नाले कैयन् शेयरधनीहरूको हकमा आघात पर्ने हुँदा एवं उर्जा कम्पनीहरूको सम्भाव्यतामा नै असर समेत गर्ने हुँदा सोसम्बन्धी कुनै कार्य नगर्नु हुन अनुरोध गर्दछौं’, विज्ञप्तिमा उल्लेख छ ।