एपीएफ र एसएसबीबीच मैत्रीपूर्ण फूटबल हुँदै

नेपाल–भारत महिला मैत्री संघको आयोजनामा शनिबार भारतको सिलगुढीमा मैत्रीपूर्ण फूटबल खेल हुने भएको छ ।

नेपालको सशस्त्र प्रहरी बल (एपीएफ)का महिला खेलाडी र भारतीय सीमा सुरक्षा बल (एसएसबी)का महिला खेलाडीबीच फूटबल खेल हुन लागेको हो ।

संघकी अध्यक्ष एवं नेपाली कांग्रेसकी सांसद चन्दा चौधरीको पहलमा उक्त खेल हुन लागेको हो ।

मैत्रीपूर्ण खेलले नेपाल र भारतका महिलाहरूको हक, हित र क्षमता अभिवृद्धि गर्दै दुई देशबीच एक आपसमा सम्बन्ध विस्तार गर्ने उद्देश्य लिइएको चौधरीले बताइन् ।

महिला सशक्तीकरणमा विशेष जोड दिँदै आएकी चौधरीले संघमा रहेर विगतमा पनि स्वास्थ्य शिविर, खेलकुद, विपद्‌मा परेकाहरूलाई राहत वितरणजस्ता सामाजिक कार्यहरू गर्दै आइरहेकी छिन् । 

‘यस खेलले नेपाल र भारतको महिला फूटबल खेलाडीहरूको क्षमता अभिवृद्धि गर्नुका साथै भाइचारा विकास गर्नेछ,’ चौधरीले लोकान्तरसँग भनिन्, ‘यो खेलले दुई देशबीचको सम्बन्ध थप प्रगाढ बनाउनेछ ।’

नेपालको तर्फबाट सशस्त्रका एसपी विकास घिमिरेले नेतृत्व गरेका छन् ।

टिममा सशस्त्रका तर्फबाट २४ जना र संघका तीन जना गरी २७ जना सहभागी छन् । 

मैत्रीपूर्ण खेल शनिबार दिउँसो ३ बजे सिलगुढीस्थित टोर्सा स्टेडियममा हुने छ ।