रविलाई काठमाडौंस्थित सरकारी वकिलको कार्यालयमा उपस्थित गराइयो, बयान शुरू

स्वर्णलक्ष्मी बचत तथा ऋण सहकारी संस्था ठगी प्रकरणको अनुसन्धानका लागि काठमाडौं ल्याइएका राष्ट्रिय स्वतन्त्र पार्टी (रास्वपा)का सभापति रवि लामिछानेलाई बयानका लागि सरकारी वकिलको कार्यालयमा उपस्थित गराइएको छ । शुक्रबार बिहान काठमाडौं प्रहरी परिसरको हिरासतबाट उनलाई बयानका लागि सरकारी वकिलको कार्यालयमा उपस्थित गराइएको हो । 

कार्यालयमा उपस्थित गराएसँगै उनको बयान लिन शुरू भएको छ । 

सहकारी ठगी, संगठित अपराध र सम्पत्ति शुद्धीकरण मुद्दाको कसुरमा अनुसन्धानका लागि कास्की प्रहरीको हिरासतमा रहेका उनलाई बिहीबार साँझ काठमाडौं ल्याइएको थियो । 

बयान सकिएपछि रविलाई पुनः कास्की नै पठाइने काठमाडौं प्रहरी प्रमुख एसएसपी बसन्त रजौरेले बताए । 

कास्कीमा जस्तै काठमाडौंमा पनि लामिछानेविरुद्ध सहकारी ठगी, संगठित अपराध, सम्पत्ति शुद्धीकरणमा अनुसन्धान भइरहेको छ। 

पोखराको सूर्यदर्शन बचत तथा ऋण सहकारी संस्थामा सहकारीको रकम ठगी र सङ्गठित अपराध कसुरमा गत कात्तिक २ गते पक्राउ परेका लामिछानेलाई जिल्ला प्रहरी कार्यालय कास्कीको हिरासतमा राखेर अनुसन्धान भइरहेको छ । उनलाई बयानका लागि यसअघि रुपन्देही लगेर पुनः पोखरा फर्काइएको थियो । 

कास्कीमा चार वटा मुद्दा खेपिरहेका रवि जोडिएको गोर्खा मिडियामा स्वर्णलक्ष्मीबाट २ करोड २८ लाख ९८ हजार ४ सय ८० रूपैयाँ पेश्कीबापत गएको देखिन्छ । स्वर्णलक्ष्मीबाट गोर्खा मिडिया नेटवर्कका तत्कालीन अध्यक्ष गितेन्द्रबाबु (जीबी) राई र प्रबन्ध निर्देशक रविको संयुक्त नाममा दुईपटक ऋण लिएको देखिन्छ । 

उनीहरूको संयुक्त नाममा २०७८ भदौ ७ गते ‘फर ह्वाट एभर लोन’बापत ४६ लाख ९८ हजार ऋण लिएकोमा अझै १४ लाख ७६ हजार ३ सय ६७ रूपैयाँ चुक्ता गर्न बाँकी छ ।

त्यस्तै, २०७८ पुस १ गते ईको सेभेन सोएट भ्यान खरिदका लागि जीबी र रविकै संयुक्त नाममा ४६ लाख ८८ हजार ऋण लिएको पाइएको छ । त्यसमध्ये पनि २९ लाख ५८ हजार ४३३ रुपैयाँ तिर्न बाँकी रहेको प्रहरी अनुसन्धानबाट खुलेको छ । 

जिल्ला प्रहरी परिसर काठमाडौंले गोर्खा मिडियाका तत्कालीन उपाध्यक्ष छविलाल जोशी बञ्जाडेलाई यसअघि नै कास्कीबाट झिकाएर सरकारी वकिल कार्यालय काठमाडौं बयान सकाएर उतै पठाइसकेको छ । सहकारीका कोषाध्यक्ष कुमार रम्तेललाई पनि बयान लिएर कास्की पठाइसकिएको छ ।

स्वर्णलक्ष्मी सहकारीको रकम गोर्खा मिडियामा जानु, रवि र जीबी मिलेर संयुक्त नाममा गाडी खरिद गर्नु र छविले समेत स्वर्णलक्ष्मीबाट ऋण लिएको घटना विशुद्ध संगठित अपराधमा जोडिएकाले उनीहरूविरुद्ध यो मुद्दा पनि आकर्षित हुने अनुसन्धानमा संलग्न प्रहरी अधिकृतहरू बताउँछन् ।

गोर्खा मिडियामा रहँदा जीबी, रवि र छविको ग्लोबल आईएमई बैंकमा संयुक्त खाता सञ्चालन थियो । सहकारीको ६५ करोड ५४ लाख रूपैयाँ गोर्खा मिडियामा ल्याएर अपचलन हुँदा २५ करोडको चेकमा रविकै हस्ताक्षर प्रयोग भएको छ । त्यस्तै, गोर्खा मिडियाबाट रवि आफैंले पनि पेश्कीबापत रकम लिएका छन् । 

गोर्खा मिडिया नेटवर्कबाट रवि आफैंले पनि ऋण तथा पेश्कीबापत २ करोड लिएको देखिन्छ । छविले भने ५ करोड ५५ लाख २२ हजार ७ सय १४ रूपैयाँ ऋण तथा पेश्की लिएका छन् ।