कमला-कञ्चनपुर सडकखण्डमा गैरकानूनी उत्खनन् गरेको भन्दै चाइना रेल्वेविरुद्ध सर्वोच्चमा रिट

धनुषाको कमलादेखि सप्तरीको कञ्चनपुरसम्मको चार लेन सडक स्तरोन्नतिका लागि चाइना रेल्वे नं. २ इन्जिनियरिङ ग्रुप कम्पनीले ढुंगा, गिट्टी र बालुवाको गैरकानूनी उत्खनन् गरेको भन्दै सर्वोच्च अदालतमा रिट दायर भएको छ ।

राम रतन सिंहसहित सात जना निवेदकले रिटमा चिनियाँ कम्पनीसहित नेपाल सरकार, प्रधानमन्त्री तथा मन्त्रिपरिषद्को कार्यालय र लहान नगरपालिकालाई विपक्षी बनाएका छन् ।

रिटमा लहान नगरपालिकाले वातावरणीय प्रभाव मूल्यांकन र प्रारम्भिक वातावरणीय परीक्षण प्रक्रिया पूरा नगरी स्वीकृति दिएको र यसैको आधारमा चाइना रेल्वेले अवैध उत्खनन् गरिरहेको आरोप छ । यो कार्यले वातावरणीय क्षति पुर्‍याएको र नदी तथा वन क्षेत्रको स्वरूप विकृत भएको दाबी रिटमा गरिएको छ ।

त्यस्तै, रिटमा लहान नगरपालिकामाथि संघीय तथा प्रदेश कानूनको उल्लंघन गर्दै स्वीकृतिबिना गिट्टी, बालुवा र अन्य स्रोतको दोहन गरेको आरोप लगाइएको छ । साथै, यस विषयमा उजुरी हुँदा पनि कुनै कारबाही नगरेको भन्दै अन्य सरोकारवालाहरूको भूमिका पनि प्रश्न उठाइएको छ ।

रिटमा गैरकानूनी उत्खनन् तत्काल रोक्न अन्तरिम आदेश जारी गरिनुपर्ने, स्वीकृत नभएका गतिविधि रोक्न परमादेश, गैरकानूनी निर्णय बदर गर्न उत्प्रेषण आदेश र अवैध अनुमति र कार्यान्वयन भएका कुनै पनि निर्णय तथा प्रक्रिया बदर गर्न आदेश माग गरिएको छ । 

त्यस्तै, वातावरण संरक्षणसम्बन्धी ऐन र नियमावलीको पालना गराउन पनि रिटमा मागदाबी गरिएको छ । अदालतले उक्त रिटमा मंसिर १६ गते पहिलो पेसी तोकेको छ ।