आफ्नो उम्मेदवार एमालेको प्रचारमा हिँडेपछि माओवादीले बाजुरामा समाजवादीलाई सघाउने

नेकपा माओवादी केन्द्रले बाजुरामा हुने उपनिर्वाचनमा एकीकृत समाजवादीलाई सघाउने भएको छ ।
 
पार्टीको तर्फबाट उम्मेदवारी दिएकी राजुकुमारी विकले एमाले उम्मेदवार सुलोचना भण्डारी बुढालाई समर्थन गर्दै उम्मेदवारी फिर्ता लिएपछि माओवादीले समाजवादीलाई सहयोग गर्ने निर्णय गरेको हो । 

माओवादीबाट उम्मेदवारी दिएकी राजकुमारीले आफ्नो उम्मेदवारी फिर्ता लिएर एमालेकी उम्मेदवार बुढाको चुनावी प्रचारप्रसारमा हिँडिरहेकी छन्। बाजुराको स्वामीकार्तिक खापर गाउँपालिकाको उपाध्यक्षका लागि मंसिर १६ मा उपनिर्वाचन हुँदैछ ।

बिहीबार एक विज्ञप्ति जारी गर्दै माओवादीका सुदूरपश्चिम ईञ्चार्ज गिरिराजमणि पोखरेलले गाउँपालिका समितिले समाजवादी मोर्चा भन्दा बाहिरको दलको उम्मेदवारलाई भोट हाल्न निर्देशन दिनु र पार्टीको तर्फबाट दिएको उम्मेदवारी फिर्ता लिइ एमालेको चुनाव प्रचारमा हिँड्नु केन्द्रीय नीति र निर्देशन विपरीत रहेको बताएका छन् । यसबारे अन्तरपार्टी निर्देशन भइसकेको उनले बताएका छन् ।

केन्द्रमा समाजवादी मोर्चालाई बलियो बनाउने उद्देश्य अनुरूप नै नेकपा (माओवादी केन्द्र) र नेकपा (एकीकृत समाजवादी)बीच केन्द्रीय गठबन्धन गरेर जाने सहमति भएको उनले बताएका छन्। सोही अनुसार स्वामीकार्तिक खापर गाउँपालिकामा नेकपाका एसकी उम्मेदवार जवा शाहीलाई समर्थन गरिएको पोखरेलले बताएका छन् ।