एनआरएनएको आरके शर्मा पक्षले पनि गर्‍यो साधारणसभा

गैरआवासीय नेपाली संघ (एनआरएनए) को राजेन्द्र कुमार (आरके) शर्मा समूहले पनि छुट्टै साधारणसभा गरेको छ । साधारणसभाले एकताबद्ध एनआरएनएका लागि पहलकदमी लिने निर्णय गरेको छ । 

सोमबार भर्चुअल माध्यममार्फत साधारण सभा गरेर सो समूहले एकताबद्ध एनआरएनएमा जोड दिँदै त्यसका लागि पहलकदमी लिने निर्णय गरेको शर्माले जानकारी दिए । 

एनआरएनएको एकताका लागि पहलस्वरुप परराष्ट्र मन्त्रालयले पूर्वअध्यक्ष शेष घले नेतृत्वको १३ जना सम्मिलित उच्चस्तरीय समितिलाई बुधबार छलफलमा बोलाएकै बेला  शर्मा पक्षले मन्त्रालयको कदमलाई स्वागत गर्दै एकताको पक्षमा निर्णय गरेको हो । 

एनआरएनएमा हाल तीन वटा समूह रहेको छ भने शर्माले बद्री केसी पक्षलाई ११ औँ महाधिवेशनयता चुनाैती दिँदै आएका छन् । ११ ‍औँ महाधिवेशनमा केसी पक्षले धाँधली गरेर चुनाव जितेको दाबीसहित असन्तुष्ट पक्षले शर्माको नेतृत्वमा गतिविधि गर्दै आएको छ । 

सोही समितिको साधारणसभाको बन्द सत्रबाट महासचिव बुद्धि सुवेदीले २० पृष्ठ लामो संगठनात्मक प्रतिवेदन पारित भएको छ । प्रतिवेदनमा परराष्ट्र मन्त्रालयले एकताका लागि थालेको पहलकदमीको स्वागत गर्दै सर्वोच्चको चैत २१ को फैसलाअनुसार एकताको महाधिवेशन हुनुपर्नेमा जोड दिएको छ । सोही प्रतिवेदनअनुसार साधारणसभाले  एकताका लागि पहलकदमी लिने निर्णय गरेको हो । 

यसैगरी कोषाध्यक्ष ठाकुर ढुङ्गानाले पेस गरेको आर्थिक प्रतिवेदन पनि साधारणसभाले पारित गरेको छ । उनको प्रतिवेदनमा करिब ८४ लाख रुपैयाँ सङ्कलन भएको र जाजरकोट भूकम्पसहित विभिन्न शीर्षकमा खर्च भएको उल्लेख छ । 

 एनआरएनएमा हाल केसी र शर्माका साथै विनोद कुँवर पक्ष रहेको छ भने एकताका लागि चैत २१ मै सर्वोच्चले फैसला गरेपनि संघभित्रको बेमेलका कारण सकारात्मक वातावरण भने बनेको छैन । यसअघि केसी पक्षले तिहारअघि साधारणसभा गरेको थियो ।