नेपाल फेरि अमेरिकासँग पराजित

अमेरिकामा जारी आईसीसी विश्वकप लिग २ मा नेपाल अमेरिकासँग पराजित भएको छ । गएराति अमेरिकाले दिएको २८२ रनको लक्ष्य पछ्याएको नेपाल २४४ रनमै सीमित भएको हो ।

अमेरिकाको डालसमा रहेको ग्राण्ड पेरी क्रिकेट रंगशालामा भएको खेलमा नेपाल ४९.५ ओभरमै अलआउट भएको हो । नेपालका तर्फबाट ओपनर अनिल साहले ८० बलमा सर्वाधिक ५२ रन जोडे भने अर्का ओपनर आसिफ शेख ६ रनमै आउट भए ।

सोमपाल कामीले ४६ रन बनाए । यसैगरी कुशल भुर्तेलले २९, कुशल मल्लले २९, आरिफ शेखले २१ र दीपेन्द्र स्रिह ऐरीले ३१ रन बनाए । अमेरिकाका सौरभ नेत्रावलकरले चार विकेट लिए ।

अमेरिका लागि तीन खेलाडीले अर्धशतक बनाए । जसमा साइतेजा मुक्कामाले सर्वाधिक ७५ रन बनाए । यस्तै कप्तान मोनाक पटेलले ६७ तथा हर्मित सिंहले ५९ रन योगदान गरे । आरोन जोन्सले २६ रन बनाए ।

टस जितेर बलिङ रोजेको नेपालका तर्फबाट गुल्शन झाले ३, सोमपाल कामी र सन्दीप लामिछानेले समान २ र कुशल भुर्तेलले १ विकेट लिए ।

नेपाल यसअघिको पहिलो खेलमा पनि अमेरिकासँग पराजित भएको थियो भने दोस्रो खेलमा स्कटल्यान्डलाई ५ विकेटले हराएको थियो । सिरिजअन्तर्गको अन्तिम खेल नेपालले स्कटल्यान्डसँग सोमबार खेल्नेछ ।

तालिकाको सातौँ स्थानमा रहेको नेपालको ११ खेलमा पाँच अङ्क छ । १२ खेलमा १६ अङ्कका साथ अमेरिका तालिकाको शीर्ष स्थानमा उक्लिएको छ ।