इन्सपेक्टरको नाममा निस्कियो ७ दिने सूचना

प्राविधिक प्रहरी निरीक्षक (इन्सपेक्टर) डा प्रिति मिश्रको नाममा गृह मन्त्रालयले शुक्रबार ७ दिने सूचना जारी गरेको छ ।  

पर्साको साविक हरिहरपुरकी उनी नेपाल प्रहरी अस्पताल, सर्जिकल शाखामा दरबन्दी भई मधेश प्रदेश प्रहरी अस्पताल सप्तरीमा कार्यरत रहेपनि लामो समयसम्म कार्यालयमा अनुपस्थित भई सम्पर्कीविहीन बनेपछि मन्त्रालयले ७ दिने सूचना जारी गरेको हो । 

मन्त्रालयका अनुसार उनी गत वैशाख १० गतेदेखि १५ दिनको घर बिदा स्वीकृत गराई बिदा बसेकोमा हालसम्म पनि सम्पर्कमा आएकी छैनन् ।  

बाटोको म्याद बाहेक सात दिनभित्र आफू गैरहाजिर रहनुको कारण खोली सन्तोषजनक स्पष्टीकरण सहित नआए भविष्यमा सरकारी सेवाको लागि अयोग्य नठहरिने गरी सेवाबाट हटाइने मन्त्रालयको सूचनामा उल्लेख छ ।