चित्रबहादुर केसीविरुद्ध किन खनिए रवि लामिछाने ?

सहकारी ठगीको आरोप खेपिरहेका गृहमन्त्री रवि लामिछानेले आइतबार प्रतिनिधि सभा बैठकमार्फत आफूविरुद्ध लागेका आरोपका खण्डन गर्न कोसिस गरे । आइतबार संसदमा सम्बोधन गर्दै रवि कांग्रेस नेताहरुमाथि आक्रामक देखिएका थिए । 

सबभन्दा बढी आक्रोश कांग्रेस महामन्त्री गगन थापाविरुद्ध थियो । गगन त्रिचन्द्र क्याम्पसको स्ववियू सभापति हुँदा अनियमितता गरेकोदेखि स्वास्थ्यमन्त्री रहेको समयमा बिपी कोइराला स्वास्थ्य विज्ञान प्रतिष्ठानमा नियुक्ति गर्दा समेत अनियमितता गरेको आरोप रविले लगाए । 

रविको आरोपबारे गगन थापाले पत्रकार सम्मेलन गरेरै खण्डन गरे । रविको शैलीलाई गगनले अख्तियारका पूर्वप्रमुख लोकमानसिंह कार्कीसँग तुलना गरे । ‘एक जना अख्तियार प्रमुख थिए, आफ्नोबारे केही कुरा उठ्यो भने फाइल खोल्दिन्छु भन्दै हिँड्ने । गृहमन्त्रीको शैली त्यस्तै देखियो फाइल खोले हुन्छ,’ थापाले चुनौती दिए । 

आइतबारको  संवोधनमा रविले कांग्रेस नेताबाहेक आक्रोश पोखेका अर्का व्यक्ति हुन्, राष्ट्रिय जनमोर्चाको अध्यक्ष चित्रबहादुर केसी । केसीको नामै नलिइ उनले नातिको नाम ढाँटेर नागरिकता बनाएको आरोप लिए । 

शुक्रवार साप्ताहिकमा प्रकाशित समाचारको सहारा लिएर रविले केसीको कुरा उठाएका थिए । चित्रबहादुर केसीमाथि रवि आक्रामक हुनुको कारण भने फागुन ३० गतेको संसद् बैठकको दृश्य सम्झिनु पर्ने हुन्छ । प्रधानमन्त्री पुष्पकमल दाहाल प्रचण्डले प्रतिनिधि सभामा विश्वासको मत लिने क्रममा केसीले दुई वटा नागरिकता भएको, दुई वटा पासपोर्ट लिएको व्यक्तिलाई गृहमन्त्री किन बनाएकोभनेर सोधेका थिए । 

उनले सहकारीको करोडौँ रुपैयाँ ठग्ने व्यक्तिलाई गृहमन्त्री बनाएको भन्दै प्रचण्ड र एमाले अध्यक्ष केपी शर्मा ओलीप्रति प्रश्न गरेका थिए । 

यसैबिच, संसदमा रविले दिएको अभिव्यक्तिले कांग्रेस झन् चिढिएको छ । ‘सहकारी ठगीमा गृहमन्त्रीमाथि संसदीय समिति गठनको मागको औचित्य झन् पुष्टि भएको छ’ महामन्त्री थापाले भने ।