पुरानो गठबन्धन तोडेर नयाँ समीकरण बनाउनु ठूलो कुरा थियो, गृह र अर्थ मन्त्रालय गौण हुन्– ओली

नेकपा एमालेका अध्यक्ष केपी शर्मा ओलीले पुरानो गठबन्धन तोडेर नयाँ समीकरण बनाउनु नै उपलब्धि रहेको भन्दै कुनै मन्त्रालयको लफडामा नलागेको बताएका छन् । नयाँ समीकरण बनाए पनि आफूहरूको ध्यान मिसन-२०८४ लाई सफल बनाउनेतर्फ रहेको उनले बताए । 

सोमवार संसद् भावनामा पार्टी संसदीय दलको बैठकलाई सम्बोधन गर्दै ओलीले देशको अवस्था सम्हाल्नै नसक्ने गरी नबिग्रियोस् भनेर आफूहरूले नयाँ समीकरण बनाएको बताए । ‘कतिपयले भने एमालेले गृह मन्त्रालय लिएन, सरकार नै परिवर्तन गर्‍यो त ! अर्थ मन्त्रालय लिएन, सरकारै परिवर्तन गर्‍यो नि ! हामीलाई कमाउनु छैन, देश बनाउनु छ । यो मन्त्रालयभन्दा ठूलो कुरा हो । मन्त्रालयको लफडामा अडिनु, तनाब र तिक्तता बढाउनुजस्ता कामहरू अहिलेका अभिभारा होइनन्,’ ओलीले भने, ‘अहिले अनुचित हानिकारक राष्ट्रिय हितलाई गम्भीर नोक्सान पुर्‍याउने गठबन्धन तोड्नु नयाँ समीकरण बनाउनु मुख्य कुरा हो अहिलेका लागि । त्यही काम एमालेले गरेको छ ।’ 

ओलीले गठबन्धन तोडेर राजनीतिलाई सही दिशामा फर्काएको उल्लेख गर्दै मन्त्रालयको कुरा गौण भएको बताए । ‘कतिले हल्ला चलाएका छन् यो मन्त्रालय किन लिएन ? कुन मन्त्रालय महत्वहीन हुन्छ ? हामीले मन्त्रालयगत प्रश्नमा होइन अन्तर्यमा, सार तत्वमा केन्द्रित हुन सिक्नु पर्छ । त्यो फराकिलोपन हामीसँग चाहिन्छ । मन्त्रालय मन्त्रालयमा झगडा गरेर जाने कि गठबन्धन तोड्ने र नयाँ समीकरणलाई उदार पनका साथ बलियो बनाउन सहयोग गर्ने ?’ ओलीले भने ।

ओलीले प्रधानमन्त्रीको कुरा आफ्नो लागि गौण भएको बताए । ‘त्यसबेलै मैले प्रधानमन्त्रीमा रुची नभएको बताएको थिएँ । समीकरण बदल्न चाहेको कुरा गरेको थिएँ, के गर्दा देशका अनुकुल वातावरण बन्छ भन्ने सोच्यौं । देश ओरालो लागेको बेला प्रधानमन्त्री नभई रोक्न सक्दैनौं भन्ने कुरा राम्रो हुँदैन’ ओलीले भने ।