सिप्रदीले जाजरकोट र रुकुम पश्चिमका भूकम्प प्रभावित परिवारहरूलाई आधारभूत आवश्यकताका सामग्री वितरण गरेको छ ।​​​

​सिप्रदीयन सहायता संस्था, टाटा ट्रस्ट भारत र सिप्रदी ट्रेडिङ प्रालिको संयुक्त प्रयासमा यही कात्तिक २६ गतेका दिन जिल्ला प्रशासन कार्यालय, जिल्ला विपद् व्यवस्थापन समिति जाजरकोट र जिल्ला प्रशासन कार्यालय रुकुम पश्चिम अन्तर्गत आठबीसकोट नगरपालिका १३ र १४ वडा कार्यालयलाई ५५ लाख रुपैयाँ बराबरको राहत सामग्री प्रदान गरिएको हो ।

तिहारमा लक्ष्मी पूजाको दिन संस्थाको प्रतिनिधित्व गर्दै सिप्रदीका ७ जना कर्मचारीहरूले बढ्दै गरेको जाडोलाई मध्यनजर गर्दै प्याकेजसहितका राहत सामग्री सम्बन्धित कार्यालयहरूलाई हस्तान्तरण गरेका थिए ।

जाजरकोट र रुकुम पश्चिममा त्रिपाल, म्याट्रेस, खाद्यान्न, साबुनका साथै न्यानो कपडा, सिरक, सिरानी र टोपी लगायतका सामग्री हस्तान्तरण गरिएको कम्पनीले जनाएको छ ।

संस्थाको अनुसार हस्तान्तरण गरेको सामग्रीहरूबाट झन्डै १ हजार २०० घर परिवारका ४ हजार ८०० जना भूकम्प पीडितहरू प्रत्यक्ष लाभान्वित बनेका छन् ।

सिप्रदीयन सहायता संस्थाका वरिष्ठ उपाध्यक्ष शम्भुप्रसाद दाहालका अनुसार भूकम्पका कारण आफ्नो घर गुमाएका र बासको वैकल्पिक व्यवस्था नभएका पीडितहरूलाई उक्त सामग्री प्रदान गरिएको छ ।​

सिप्रदीयन सहायता संस्था, टाटा ट्रष्ट भारत र सिप्रदी ट्रेडिङको संयुक्त प्रयासमा स्थानीय प्रशासनसँग समन्वय गर्दै राहत वितरण गरिएको उनले जानकारी दिए । ‘प्रशासनको अहिलेको प्रमुख आवश्यकतालाई मध्यनजर गर्दै त्रिपाल, खाद्यान्न र न्यानो कपडाहरू हस्तान्तरण गरेका छौं र भविष्यमा पनि सिप्रदीयन सहायता संस्था सक्रिय रहेर निरन्तर रुपमा सहयोग पुर्‍याउने नै छौं’ उनले भने ।

आठबीसकोट, रुकुमका नगर प्रमुख रवि केसीले नगरका भूकम्प प्रभावितलाई सिप्रदी सहायता संस्थाले गरेको सहयोगप्रति आभार व्यक्त गरे । सहयोगले यस प्रकोपले दुःखमा परेका नगरबासीलाई राहत मिलेको उनले बताए ।