गौतमबुद्ध क्रिकेट रंगशाला बागमती प्रदेश र भरतपुर महानगरले बनाउने, ७५ करोडको टेन्डर आह्वान हुँदै

चितवनको भरतपुरस्थित गौतमबुद्ध अन्तर्राष्ट्रिय क्रिकेट रंगशाला बागमती प्रदेश सरकार र भरतपुर महानगरपालिकाले मिलेर बनाउने सहमति गरेका छन् । प्रदेशको ७० प्रतिशत र महानगरको ३० प्रतिशत लगानीमा बनाउने सहमति भएको हो । यसका लागि भरतपुर महानगर तत्काल ७५ करोड रुपैयाँको टेन्डर आह्वान गर्ने समझदारी भएको बागमतीका मुख्यमन्त्री सालिकराम जमकट्टेलका सल्लाहकार डीपी ढकालले जानकारी दिए । 

‘अब गौतमबुद्ध अन्तर्रास्ट्रिय क्रिकेट रंगशाला प्रदेश सरकारले ७० प्रतिशत र भरतपुर महानगरपालिकाले ३० प्रतिशत लगानी गरेर निर्माण हुने भयो । मंगलवार मुख्यमन्त्रीज्यूको अध्यक्षतामा अर्थमन्त्रीज्यू, सामाजिक विकासमन्त्रीज्यू, भरतपुर महानगरका मेयरज्यू र प्रदेशका प्रमुख सचिवज्यू लगायतको उपस्तिथिमा उक्त  निर्णय भयो,’ ढकालले सामाजिक सञ्जालमा लेखेका छन्, ‘अब तत्काल ७५ करोड रुपैयाँको टेन्डर भरतपुर महानगरपालिकाले गर्नेछ ।  खेलप्रेमीहरूका लागि यो सुखद खबर हो ।’

हाँस्य कलाकार जोडीद्वय सीताराम कट्टेल ‘धुर्मुस’ र कुञ्जना घिमिरे ‘सुन्तली’ले निर्माण आरम्भ गरेको यो रंगशाला अहिले अलपत्रको अवस्थामा छ । मैदान सम्याउने र प्यारापिटका लागि पिलर उठाउने काम शुरू भए पनि बजेट अभाव भएको भन्दै उनले काम अगाडि बढाउन छोडेका थिए ।