मोहालीमा भएको एकदिवसीय क्रिकेटमा अस्ट्रेलियालाई ५ विकेटले पराजित गरेसँगै भारतीय क्रिकेट टोलीले नयाँ इतिहास रचेको छ । भारतीय क्रिकेट टोलीले क्रिकेटका तीनवटै फर्म्याट, टेस्ट, ओडीआई र टी–२० मा एकैसाथ नम्बर १ को वरीयतामा कब्जा जमाएको हो । 

सन् २०२३ को विश्वकपअघि भारतीय क्रिकेट टोली तीनवटै फर्म्याटमा नम्बर १ बनेको हो । भारत तीनै फर्म्याटमा पहिलो नम्बरमा भएको यो पहिलो पटक हो । यसअघि सन् २०१२ को अगस्टमा दक्षिण अफ्रिकी क्रिकेट टोलीले पनि यस्तै उपलब्धि हासिल गरेको थियो।

एसिया कप जित्दा पनि भारत आईसीसी एकदिवसीय वरीयतामा दोस्रो स्थानमा थियो भने पाकिस्तान फाइनलमा नपुगे पनि पहिलो स्थानमा थियो ।

भारतले आफ्नो वरियतामा ११६ अंक बनाएर पाकिस्तान (११५) लाई पछि पार्दै नम्बर १ टोली बनेको छ । अस्ट्रेलिया १११ अङ्कसहित तेस्रो स्थानमा छ ।