माओवादी केन्द्र पार्टी एकताका लागि नाम फेर्न तयार, महाधिवेशनबाट निर्णय लिने

नेकपा (माओवादी केन्द्र) पार्टी एकताका लागि नाम फेर्न तयार देखिएको छ । पार्टी महासचिव देव गुरुङले सोमवार एक परिपत्र जारी गर्दै पार्टी एकतालाई सफल तुल्याउन नेकपाको पछाडि कोस्टमा रहेको ‘माओवादी केन्द्र’का बारेमा छलफल गर्न सकिने बताएका छन् ।  

यद्यपि, माओवादी केन्द्रले पार्टीको नामबारे आगामी महाधिवेशनमा छलफल गरेर निर्णय लिन सकिने बताएको छ ।

‘नेपाल कम्युनिस्ट पार्टी (माओवादी केन्द्र) र अन्य कम्युनिस्ट घटकहरूसँग पार्टी एकताको विषयमा गम्भीर ढंगले वार्ता, संवाद र छलफल भइरहेको सन्दर्भमा पार्टी एकतालाई सफल तुल्याउनका लागि नेकपाको पछाडि कोस्टमा रहेको माओवादी केन्द्रका बारेमा आगामी महाधिवेशनमा छलफल गरी आवश्यक निर्णय गर्न सकिने छ,’ अध्यक्ष पुष्पकमल दाहाल प्रचण्ड र महासचिव गुरुङले हस्ताक्षर गरेको परिपत्रमा भनिएको छ ।

यस्तै, संघीय संसद् (प्रतिनिधिसभा र राष्ट्रियसभा)का सांसदहरूलाई संसद्को बैठक र विषयगत समितिका बैठकहरू प्रभावित नहुने गरी तीन महिने अभियानमा उपत्यकामा जिम्मेवारी दिनसमेत माओवादी केन्द्रले निर्णय गरेको छ ।

अहिले माओवादी केन्द्रले माधवकुमार नेपाल नेतृत्वको नेकपा (एकीकृत समाजवादी), डा बाबुराम भट्टराई नेतृत्वको नेपाल समाजवादी पार्टी, नेत्रविक्रम चन्द नेतृत्वको नेकपासहित विचार मिल्ने दलहरूसँग एकताको प्रयास गरिरहेको छ । 

आफ्नो नाममा माओवादी पृष्ठभूमिका अन्य दलले असहमति जनाएपछि माओवादी केन्द्रले विकल्प खुला राखेको हो ।