आठौं वर्ष प्रवेशमा हाम्रो प्रतिबद्धता– आर्थिक मन्दीसँग जुध्दै खोजी पत्रकारितामा थप निखार

लोकान्तर सञ्चार प्रालिद्वारा सञ्चालित लोकान्तर डट्कम (Lokantar.com) स्थापनाको सात वर्ष पूरा गरेर आजदेखि आठौं वर्षमा प्रवेश गरेको छ ।

यस अवसरमा सबैभन्दा पहिला हामी हाम्रा समस्त पाठक, विज्ञापनदाता र शुभेच्छुकहरूप्रति विशेष आभार प्रकट गर्न चाहन्छौं ।

तपाईंहरूको शुभेच्छा, हौसला र प्रेरणाले लोकान्तर डट्कम यात्रामा अविराम खटिरहन सकेको छ भन्ने हाम्रो बुझाइ छ ।

प्रथम राष्ट्रिय पत्रकारिता दिवसको अवसर पारेर २०७३ वैशाख २४ गते हामीले खोजी पत्रकारिताको एउटा नयाँ अध्याय शुरू गरेका थियौं ।

जुन सोच राखेर लोकान्तरको यात्रा शुरू भएको थियो त्यसमा थोरै भए पनि लक्ष्य प्राप्त गर्न सकेको हाम्रो मूल्यांकन छ ।

मूलधारका मिडियामा खोजी पत्रकारिताको धार भुत्ते हुँदै गइरहेको समयमा हामीले त्यसैलाई मूलमन्त्र मानेर कठिन यात्रा शुरू गर्‍यौं, जतिबेला चलनचल्तीको भाषामा अनलाइन भनिने डिजिटल पत्रिकालाई राज्यले ‘रिकग्नाइज’ नै गरेको थिएन । तर, अहिले अनलाइन पत्रिकाहरूमा आइरहेका खोजमूलक समाचारले मूलधार मिडियाको परिभाषा पूरै बदलिएको छ । हामी अघिअघि र परम्परागत मिडिया पछिपछिको अवस्था छ ।

सात वर्षको समयमा हामीले सुशासनलाई केन्द्रमा राखेर खोजमूलक समाचारलाई प्रधान विषय बनायौं । हामीले उठान गरेका कैयौं विषयमा अख्तियार दुरुपयोग अनुसन्धान आयोगले अनुसन्धान सकेर भ्रष्टाचार मुद्दा दायर गरेको छ । न्यायपरिषद्ले छानबिन गरेर न्यायाधीशसमेतलाई कारवाही गरेका धेरै उदाहरण छन् । सरकारले नीतिगत निर्णय सच्याएको छ । सांसदहरूलाई नियममा बस्न बाध्य बनाएको छ ।

राजनीतिको भित्री कुरा र समाजको बदलिँदो चित्रलाई हामीले पाठकसम्म पुर्‍याइरहेका छौं । जे होस्, ‘सिंहदरबार’ले हामीलाई पढ्न र सुन्न थालेको छ । यी विषयलाई हामीले हाम्रो सफलता ठानेका छौं । 

आगामी दिनमा हाम्रो मुख्य ध्यान खोजमूलक पत्रकारिताका माध्यमबाट पारदर्शी शासन स्थापनाका लागि सघाउनेतर्फ हुनेछ । ‘खोजी पत्रकारिता’ गर्छु भन्न सजिलो छ, व्यवहारमा उतार्न कठिन छ । पटक-पटक सरकारी कार्यालय धाएर सूचना ल्याउने र त्यसलाई पाठकसम्म पस्किने काम सहज छैन । तर, हामी त्यही अप्ठ्यारो काममा नतिजा निकाल्ने प्रयत्न गर्नेछौं । 

कोरोना महामारी, युक्रेन युद्धलगायतका कारणले देखापरेको आर्थिक मन्दीका कारण बजार नराम्ररी प्रभावित छ । त्यसको प्रत्यक्ष मार मिडिया उद्योगले सामना गरिराख्नुपरेको छ । यस चुनौतीलाई चिर्दै हामी नयाँ ऊर्जासाथ खोजमूलक पत्रकारिताको धारलाई अझ तेजिलो बनाउने प्रण गर्दछौं । 

खोजमूलक, विश्वसनीय र सन्तुलित सामग्री पस्कनुका अलावा हाम्रो मिडियालाई पाठकसामु अझ बढी परिचित गराउँदै अघि बढ्ने हाम्रो अभियान पनि निरन्तर चल्नेछ ।

सधैँझैं हाम्रा गल्ती-कमजोरी औंल्याएर सन्मार्गमा अघि बढ्न तपाईं समस्त पाठकको रचनात्मक सुझाव र प्रतिक्रियाको अपेक्षा हामी गर्दछौं ।